噚日中原集團主席兼總裁施永青拍住地產代理業界八大商會，同埋幾位立法會議員踩上金管局，促請放寬按揭措施，會後見傳媒，施老闆又成焦點。事關施老闆旗下免費報《AM730》嘅地產版即將消失，施老闆做地產代理，都唔重視地產版，唔係化？！
施老闆就解釋，對於自己份報紙改版，冇畀意見，佢都係「被通知」咁話。佢強調，《AM730》係地產版與經濟版結合，此舉的確反映市況唔好，少咗人關心樓市，屬下中原與利嘉閣都落少咗廣告去《AM730》，不過份報紙仍有合理利潤，季季派花紅，營運冇問題。
至於中原，雖然擱置上市計劃，但集團住宅部上月錄得佣金收益達3.6億元，係超過5年半以來最高單月紀錄。
施永青卻指，呢個係特殊情況，要等二手市場有番穩定收入，先算正常。