【科技籽：發燒專科】
夏天，為大地帶來雨水；而雨水，正是心愛靚鞋的頭號天敵！直接弄濕事小，最怕雨水變污水，稍一不慎變黃發黑回天乏術。加上白鞋大熱，不容一點瑕疵，為求自保，不少潮人選擇防水噴劑，但同類產品越出越多，究竟哪款才是貨真價實？今日一於來趟終極測試！洗鞋護鞋達人李熲墀（Ivan）更會提供實用貼士，愛鞋之人必睇！
波鞋大熱，連護鞋用品亦大行其道，是次測試找來5款較常見的防水噴劑，包括Liquiproof、crep、Reshoevn8r Defener、Circle及Jason Markk Repel。它們的份量及價錢各異，當中以Liquiproof最昂貴，50ml便索價$140，Defener則最便宜，10oz（約300ml）只售$190。Ivan說：「根據我嘅經驗，以US9號鞋做例子，每對鞋噴三層嚟計，Liquiproof大概噴到兩對、crep係四至五對、Defener約八對、Repel約六對、Circle就係四對。」單看抵用程度，Defener先勝一回。
Ivan提醒，防水噴劑不可亂用，要視乎鞋身物料，「其實皮料同膠料本身已經有防水特性，再噴防水噴劑就會出現啞面、霧面嘅問題，亦會影響顏色，甚至造成破壞；而布料同時下流行嘅針織面就最啱用。」他又指很多人以為噴劑跟麖皮不相容，怕令皮面局部變色，其實噴後用軟毛刷向同一方向輕掃，即可保持原有色澤。
先清潔後掃勻 記得清理膠位、中底
或者你會以為，噴劑噴得均勻便可，Ivan卻說功夫頗多，絕對不能馬虎，否則防水效果會大打折扣，「首先要清理鞋面，因為防水噴劑會滲入鞋面，形成一層保護膜，如果就咁直接噴，有機會令啲污糟嘢深入鞋面。清洗完之後，都要等對鞋乾晒先噴，就算新鞋都要喺噴之前用軟毛刷掃走鞋面嘅微塵。」Ivan又解釋，防水噴劑多分為水劑及壓力噴劑兩種，噴法各有不同，水劑力度較弱、滲透力強，應緩慢地逐次噴上，直至整個鞋面均有濕潤的感覺為止；壓力噴劑力度較強，應連續噴射，並從鞋面的左、中、右端，每端來回連噴兩、三回，確保平均鋪滿，切忌停留在同一位置噴灑。唯一相同的是，噴時兩者都要離鞋面約10cm至20cm。
「其實就咁噴好難完全均勻，最好係噴完之後，即刻用軟毛刷向同一方向輕輕咁掃，令佢更均勻，滲透得更好。」Ivan邊掃邊說。雖說不宜噴在膠質之上，但很多鞋款都有塑膠部份，難以避免，「例如好受歡迎嘅Ultra Boost同Sock Dart，鞋面都有膠嘅部份，噴完之後記得喺未乾嗰陣用毛巾抹乾淨，中底部份都要清理好。」另外，Ivan說噴完一層後，最少要等一至兩小時讓其完全乾透，再以同樣方法噴兩至三次才最理想，極考心機與耐性。
惡戰清水豉油辣醬 Liquiproof全勝
五對白飯魚會分別噴上五款防水噴劑，風乾兩日後，再在鞋面倒上清水、豉油及辣椒醬，藉此測試防水防污效能。清水測試中，惟獨Circle較為失色，沾了數滴水後，鞋面已有明顯滲水，其餘則可輕易跣走。到了豉油測試，Liquiproof表現最佳，只有輕微污迹，Circle繼續包尾，其餘則不過不失。最後是難度最高的辣椒醬測試，初時五對鞋都跣走汁醬，但其後開始失效，噴了Liquiproof及crep的兩對鞋，鞋面跟中底之間的邊位出現滲漏，其餘則出現大片污迹。
清 水
豉 油
辣 椒 醬
測 試 結 果
噴鞋小貼士
「防水噴劑難免有化學成份，甚至有人話噴咗某啲品牌嘅噴劑之後有變黃嘅情況，但我個人就未試過，就連國產嘅Circle都冇呢個問題。」不過Ivan提醒，噴後只能風乾不能曬乾，否則容易變黃，另外亦有幾個小貼士：
1.防水噴劑是化學品，亦有一定氣味，最好在空氣流通的地方使用。
2.針織物料有不少空隙氣孔，防水噴劑只能輕微跣走水滴，不能期望完全防水。
3.防水噴劑會有損耗，曾經沾濕或時間久了，保護膜便會失效，常穿的話，最好每三個月補噴一次。
4.噴上防水噴劑後，若鞋面沾上污迹應即時用水沖洗，而非用紙巾或抹布，避免把污
同場加映：土炮蠟燭防水法
其實是次比拼還有第六位選手，是Ivan介紹的土炮平價方法，「用蠟燭喺鞋面擦一層蠟，然後再用風筒將啲蠟熱熔，等佢滲入鞋面從而防水。」不過得花一定氣力才能把蠟擦上布面，亦不易均勻，吹熱風時亦要小心別把膠水熱熔。實試防水效果尚算不俗，有跣水效果，亦能抵抗大部份豉油，或因未夠均勻，中底邊位出現明顯滲漏，面對辣椒醬時則不堪一擊。但以超便宜的價格來說，表現合格有餘。
記者：韓繼聰
攝影：許先煜、林栢鈞
編輯：陳國棟
美術：孔文彬