中午校友飯局，因博士T自法國回港，搵左丁山食飯，索性叫埋佢參加，見吓啲佢未必認識嘅校友，大家一齊到，剛坐低啫，博士C翩然而至。兩人你望我，我望你，博士C話：「好耐冇見咯噃！」原來當年大家留學巴黎，博士T讀物理博士，博士C讀數學博士，眨吓眼大家都退休咯。博士T話：「其實我哋在巴黎讀書也不常見面，我讀過巴黎第四、第九大學，博士C在巴黎第七大學，唔同學校。」係囉，但畢竟同是中大出身，雖然書院有新亞、聯合之分，在巴黎留學時仍有交流嘅，現在呢？唔再講物理、數學咯，講吓紅酒便是。博士T叫左丁山去喜來登參加一個法國酒莊嘅Vertical Tasting。左丁山大鄉里，不知何謂垂直試酒，博士T話：「今個星期香港有紅酒展覽會，不少酒商來香港參展，一個我相熟嘅法國酒莊帶咗同一牌子，不同年份嘅紅酒嚟，招待有關人等，逐個年份試，就叫做垂直試酒。」
哦，咁就試過一次，不過嚴格嚟講，唔係試，而係飲。有一年田北俊議員雅興大發，邀請一班朋友，多來自傳媒界，嗰陣時黃毓民仲未做議員，同左丁山一齊去參加田大少之福臨門夜宴。田大少擺齊1940年代、50年代、60年代、70年代、80年代嘅代表性年份紅酒（例如1982），逐支飲，認真豪爽，夠晒大方，於是乎飲到逸興遄飛，幾乎羣呼田少萬歲。
博士T雖然邀請去試酒，左丁山還是推了，一來自己唔係真正酒客，飲靚酒根本嘥料，二來飲到第三杯已經會開始面紅紅，無謂浪費機會。博士T話：「可惜也，酒展之後，我就去北京為去年在香港出版之紅酒書舉行中國版發佈會，那麼後會有期了。」退休後如此生活，令人垂涎，可惜左丁山留學泰國，不是法國，學習唔到法國文化。博士C就講起佢最近有錢存入銀行，俾銀行追查，係要佢講出財富來源，佢好唔高興，欲以私隱理由唔作答。左丁山識得賓架多，知道此乃金管局對銀行之要求，KYC、AML指引是也，銀行即使明知老客戶之錢財由來，為咗向金管局交代，仍要逼老客戶正式作答。唔答又點？咪取消你個戶口，叫你搬錢走囉，但第二間銀行又未必肯同你開新戶口呢！於是叫博士C同銀行合作，行得正，企得正，怕乜講，不過客戶好似剝埋底褲俾銀行睇全身，係條氣係唔順嘅嘞。