早幾日高C9喺專欄話：財演叫人買股，背後一定有agenda。小生有朋友做財演，所以頗了解財演推股的動機同選股準則，有冇不可告人的agenda，答案係Yes & No。
外界最常懷疑嘅，當然係財演唱好自己揸住嘅股，話就話「本人沒持有上述股份」，實情用配偶與子女以外的親友戶口持有 ，試過有財演因而被證監釘牌。為免斷送前程，冒險嘅人應該唔多。
較常見嘅其實係去完上市公司飯局，又食又拎，甚或出埠睇廠，包機票酒店吃喝，就算覺得隻股麻麻哋，返去少不免喺專欄美言幾句。有來有往，下次食飯自然預埋你。
另一種係選股擂台，每日揀中升幅最高的股份者，就成為台主。揀中暴跌股亦唔會被標籤為「燈神」。台主制度，有如對沖基金的表現費，贏就有獎勵，輸就無所謂，於是有人為求威水，一味推三四線股，多數都係剛剛爆升、創新高之股仔，原因無非「技術突破」之類，佢隨時連間公司業務係乜都唔知。
財演閒閒哋幾十人，曝光率最高嗰幾位，日日幾個專欄，如上所述者固然有，但其實邊有咁多鱔稿要寫？真材實料、有理有據嘅股評，都有唔少。老套講句：散戶睇專家分析，務必獨立思考，切忌照單全收。
笑笑生
mailto:[email protected]
本欄逢周五刊出