52歲荷李活型男Johnny Depp同女星Amber Heard今早傳來離婚消息，有指Amber美國時間星期一單方面向法院申請離婚，理由係「難以化解的歧異」。佢哋婚前婚後都不時喺公開場合出雙入對，認真羨煞旁人。之但係魔盜王繼三日前媽媽過身，今朝再「被離婚」，男人最痛都可算是這種。
分開簡單抹去往事極難，男士們雖然望落去好硬淨，女士們睇落又好似好柔弱，但唔好以為分手或離婚就一定係女士較男士慘豬豬，紐約賓漢頓大學（Binghamton University）同倫敦大學學院（University College London）合作做過研究，原來女士情感同生理上痛苦程度較男性高，但隨時間會變得更堅強；相反男士心中有不能磨滅嘅傷口，但會帶住呢個傷痕繼續生活。
呢個研究搵咗來自96個不同國家，共5,705位參加者為因同伴侶分開而受嘅情感痛楚（emotional pain）同身體痛楚（physical pain）評分，以10分為滿分，發現女士所受情感痛楚為6.84分，身體痛楚為4.21分，分別較男士多出0.26分同0.46分。點解會咁？負責呢個研究嘅導師Craig Morris以男女天性上不同去解釋兩性分別，指女性天生肩負生育責任，揀伴侶時會揀擇啲，無論身心亦投入更多，分離時就會更痛；男性則因為要同同性競爭女伴，短時間內再次「覓食」冇足夠時間復原，要到夜深人靜先會發現失去嘅伴侶係無可取代。
記者：黃樂雯
資源來源：《每日郵報》