本土思潮冒起，年輕一代嘅六四情越嚟越淡薄，對於支聯會嘅「建設民主中國」綱領，唔少年輕人唔多受落，學聯亦喺今年退出支聯會。六四維園燭光集會最終有幾多年輕人參加？目前當然無從估計，但支聯會都唔希望燃點咗26年嘅平反之火，喺第27年黯淡無光。
為咗繼續薪火相傳，支聯會今年首度搵人拍片宣傳六四集會，已經放咗喺佢哋facebook，片中穿插父親同女兒嘅獨白（圖），前者坐喺維園，後者係政總，分別回顧六四學運同雨傘運動嘅心路歷程，以「公義路上，總有他們」作結。
八方問過支聯會副主席蔡耀昌，佢話首次搵人幫手拍片宣傳集會，無非係想多啲年輕人了解六四，由內容到搵主角兼攝製，支聯會都任佢哋發揮，對製成品好滿意。