唔少香港人𠵱家嘅願望係換走現任特首，稍為有機會出嚟參選特首嘅仁兄，大家都捉實佢，希望佢話有意參選，可以帶畀香港人一絲希望。
好似噚日南豐集團董事長兼行政總裁梁錦松出席活動，有一間本地生物科技公司「水中銀」宣佈，獲得由南豐領投嘅B輪融資，呢間公司係人工培育魚去驗毒，梁錦松手上就拎住一缸驗毒魚。梁錦松仲加入水中銀任業務諮詢委員會主席。
傳媒乘機又捉住佢問，如果打算選特首，會唔會需要辭職，梁錦松只係簡單答一句：「冇計劃」，咁即係冇計劃選特首，定冇計劃辭職呢？佢就以一個親切嘅笑容作回應，又畀大家無限想像空間。
佢只係強調，本港一定要發展金融、旅遊業以外嘅「三創」，即創意、創業同創新，佢鼓勵年輕人創業，亦正研究教育議題，希望改善香港教育問題，呢堆想法，又好似為選特首而做喎。