民主黨劉慧卿嘅網上節目《議會內外》噚日翻生，專為行政會議成員兼港大校委會主席李國章加開一集，亞瑟王呢次係做找數真漢子，走會接受卿姐訪問，兩人仲喺節目擦出唔少火花。
節目期間，兩位表面上談笑風生，實情刀光劍影。一時間卿姐老實不客氣直呼亞瑟王做「沙皇」，亞瑟王就懶幽默話沙皇被人斬咗頭㗎。轉個頭，亞瑟王聲稱佢同港大啲院長講，若學術自由被人打壓就搵佢出面，卿姐立即轉身射個三分波，話如果係被亞瑟王打壓就搵卿姐喇。
節目後卿姐陪住亞瑟王受訪，八方問亞瑟王，撐唔撐特首梁振英連任，竟然開展咗佢兩位撐唔撐政改嘅爭論，幾乎連八方問嘅問題都差啲唔記得咗。好彩亞瑟王毋忘初心，但都係講咗啲，到時再算之類嘅說話囉。