「訪京槍炮團」事發後，民建聯蔣麗芸暗撐，話由相片可見夜蒲團友攬住嘅女仔，係有着衫褲同鞋嘅。佢噚日喺立法會，仲出錢出力撐「叫雞」，講緊炸嗰啲啫！
體育、演藝、文化及出版界議員馬逢國早前投訴記者喺立法會走廊食飯，加上無綫近日因頒獎禮食炸雞被罰15萬元後，民建聯蔣麗芸噚日嚟個「一箭雙雕」，用咗成千幾蚊買咗30幾盒炸雞，擺喺立法會走廊請記者食。元秋話喎，明白記者有時要採訪，冇辦法好好坐低喺餐廳食飯，所以對記者喺走廊食飯表示「好諒解、好同情」，特別請食雞，「希望大家都有啖好食」。
阿涂︰叫《東張西望》嚟影
自掏腰包之餘，元秋仲應記者要求，特登走入會議廳邀請馬逢國一齊食雞，可惜當時馬逢國唔喺度，佢就轉而「捕獲」路過嘅經民聯林健鋒一齊開餐。林健鋒好搞笑咁提醒元秋，小心被罰15萬呀，元秋話唔怕，點解？「我食得好靚㗎！」繼而指「雞係好食過Pizza」，隨即現場表演食雞，教路話首先要攞起嚿雞，跟住望下，再放入口，食完「嗯」咗幾聲，佢就大叫「好好味喎」，代言效果隨時勁過無綫嗰班藝員喎！
唔少傳媒路經走廊，見到炸雞堆積如山，都忍唔住問：「無綫請㗎？」民主黨涂謹申行過時亦忍唔住抽水問：「使唔使叫《東張西望》嚟影？」而其實呢，馬逢國之後一度路過立法會走廊，被問到記者喺走廊食雞有冇問題時？佢話「冇問題啊」後就快閃。
李八方
mailto:[email protected]
