負責監控新盤銷售嘅一手住宅物業銷售監管局（銷監局），日前出現咗人事變動。銷監局專員馮建業，同食物及衛生局副秘書長（食物）陳鈞儀互換職位，剛剛喺星期二已經生效。
一手新例由2013年4月底實施，至今剛逾3年，只係做過一宗檢控咁大把，馮建業不時被批評為「無牙老虎」，次次見親記者都被窮追猛打。但據局方內部人士講，今次變動係於本周二開始，強調專員換人好平常，指「A.O.成日都調來調去」，今次變動完全同專員嘅功績表現無關，叫傳媒「唔好諗多咗」。
睇番新任專員，據政府資料顯示，陳鈞儀早於1987年加入政府，做過保安局同公務員事務科等部門；至於做食物及衛生局副秘書長，主要負責規管有關食物供應、食物安全標準等，不過佢哋都應該習慣調來調去。