跑手永遠有跑唔完嘅賽道，為中年人榮譽而跑嘅全馬達人、恒生銀行（011）大公關張樹槐（水哥），又真係跑得幾密，上月初先喺黃河入口，完成第58個「香檳馬拉松」（今年佢老哥剛好58歲），啱啱呢個星期日，佢又飛咗去有「東方槐城」之稱嘅大連市，跑呀跑，跑到槐樹開花，完成個人第59項馬拉松賽事。
大連全馬係內地第二個歷史最悠久嘅馬拉松賽事，槐樹亦係大連市嘅「市樹」，每年5月至6月初，市內大街小巷，槐花盛放，市政府為推廣旅遊，自1989年至今，已舉辦26屆「賞槐會」。
名叫「樹槐」嘅水哥，喺市內百年槐樹之間穿梭，當然別具情「槐」。數數下，佢下一站已是第60個馬拉松，唔知呢個「花甲全馬」，戰場會喺邊？