因為喺《愛．回家》亮相做「馬家好」，而為人知徐榮嘅半歲細女徐心怡（包包），樣貌十分可愛趣緻，旋即被網民like爆，而徐榮亦好識做，不時喺fb「派福利」，放好多囡囡嘅相俾粉絲解渴。
昨午，徐榮就喺佢嘅fb，分享咗佢同乖女包包嘅多張合照，徐榮話：「收外景又未夠鐘開廠，返嚟搵包包先，佢個樣好好奇。」
相中嘅包包對滿面鬍鬚嘅爸爸非常好奇，向住鬍鬚又摸又哄，抱住包包嘅徐榮就冧到震。網民都大讚包包可愛，而包包嘅趣緻一向都得到肯定，佢哋父女之前就應邀為嬰兒衛生產品拍攝廣告。而包包亦擁有其個人facebook帳戶「Tsui Siu B」不時更新近況。