婉君與華生拍拖八年，華生勤奮上進之餘，處處以婉君為先，倆人儲夠首期，本來打算共諧連理，並以九龍灣私樓兩房單位為目標。不過當婉君父母得悉她結婚置業的決定後，反應非常大，不斷詢問華生家庭背景，還指出華生少年時曾犯事，企圖令婉君知難而退。
「女啊，你知道阿爸捱生捱死，都係想你哋四姊妹出人頭地，唔使捱窮之餘又養到屋企！𠵱家你竟然嫁畀個公屋仔？」「爸啊，華生好努力工作，六年內升三級！我同佢已經儲夠首期，結婚之後會買樓一齊住！」「女啊，媽咪知你愛佢，不過佢始終犯過事，將來前景有限！」「媽啊，華生雖然犯過事，但我識佢八年，佢一直努力改過自新，唔會再犯！」婉君父母愛女心切，不希望婉君受苦，希望她另選別人結婚。「其實永豪都唔錯，他大學時也和你很親密；他家住西半山，家族大把物業；又在金融機構任職助理董事，年薪過百萬，應該能給你幸福」。
「媽啊，揀老公唔係揀老闆！我最重視男人夠唔夠專一！永豪雖然大把錢，對我算唔錯，但讀大學時已知佢每晚花天酒地，至今不變！華生雖然窮，但佢心中只有我，又肯同我一齊儲錢一齊捱，佢仲改咗好多壞習慣，喺華生身上，我見到希望！又係你教我做人要睇長線嘅」。「女啊，你𠵱家大個喇，要為自己嘅決定負責」。父母說不過婉君，唯有無奈接受。
揀男人，也許和買樓一樣，眼光決定將來。
地產小子
http://www.propertykids.blogspot.hk
本欄逢周四刊出