訪京槍炮團近日為普羅大眾提供唔少剝花生機會，勾起唔少政商界中人北上時到訪KTV等夜場嘅趣聞。自由黨主席鍾國斌Felix分享一件趣事，佢自爆以前到訪北京時去過政商界熱爆蒲點「天上人間」，仲要俾成班囡囡圍，重要嘅係，佢老婆都在場㗎！
1993年開張嘅天上人間夜總會位於北京朝陽區，係當年北上嘅政商界及專業人士聚腳地，Felix憶述十幾年前試過帶埋太太去見識，由於佢攜眷入場，在場囡囡冇埋佢身，點知太太一去洗手間，成班女仔突然坐喺佢周圍，Felix冇形容當時係驚惶失措定歡喜若狂，只係話太太返到位見到此「盛況」，笑笑口問佢：「我企喺邊度好呢？」一班囡囡自然醒目散水。