不少人會在假日到新界踩單車耍樂，親親大自然，不過你又沒有想過平日在市區，都可以用單車代步，甚至踩單車返工呢？
記者：梁嘉怡
攝影：伍嘉亮 邱仲權
61歲的Uncle Moon是音樂班及射箭班導師，亦是單車發燒友，平時出街上班全靠兩個碌，不過他家住南丫島，上班的地點卻是九龍城，如此迂迴的路線，也能踏單車上班嗎？
Uncle Moon倒是輕鬆回應：「單車係好方便。」要出九龍城，他首先會搭一程渡輪到中環，然後由碼頭踏單車出發，花不到半小時的時間，沿海邊經龍和道、鴻興道、維園道、電氣道及渣華道，直踩到北角碼頭，接著轉乘渡輪到九龍城，最後由碼頭踩約五分鐘，到達他工作的地方馬頭圍邨。因為中途要等船的緣故，踩單車上班比乘車約多花半小時，不過Uncle Moon十分喜歡以兩個碌代步，「（踏單車）有啲人話減碳啦，滿足我玩嘅心情啦。慢慢踩，又可以運動。」Uncle Moon說，踏單車可以省卻上落地鐵及等車的時間，若然上班路線在8至10公里以內，效率可以很高：例如由灣仔碼頭踩到中環，其實只需約10分鐘；從順利邨到尖沙咀亦只需約35分鐘。
Uncle Moon平日有義務教導有興趣人士在馬路踏單車的技巧，其中一個學員璐芸兩個多月前亦成為單車上班族，現時每星期有一兩天，會由紅磡踏單車到九龍灣的教會上班。她會避開較多車的馬頭圍道及太子道東等，經高山道、天光道到九龍城，在新蒲崗過隧道去啟德發展區，再踩往九龍灣，全程需時約45分鐘。踏單車要繞路，比坐巴士約多花15至20分鐘，也要帶裝備及替換的衣服，不過璐芸還是覺得值得，「可以當一個運動嘅時間，又可以俾自己出下汗，其實都好好。好多小朋友見到你踩單車，會俾你鼓勵啦，甚至有啲小巴司機會同你打招呼，你會覺得同人關係近咗。」
加強教育及配套 推動「單車友善」社區
不少人都擔心在馬路踏單車很危險，璐芸坦言一開始亦會感到害怕，「就係因為驚，所以要學好啲個技術。當你慢慢嘗試去克服每一段嘅路嘅時候，甚至係你同司機點樣去溝通嘅時候，你會覺得好有滿足感。」Uncle Moon說，一些駕駛者對單車友的態度並不友善，「有人喺馬路到鬧我哋唔應該喺馬路踩單車」；而香港不少馬路都很爛，譬如有足以卡住輪軚的坑位，對車友來說都有風險；不過他說，有些車友技術不精，或不帶齊安全裝備，卻挑戰踩馬路，亦是危險之舉。
Uncle Moon認為，社會其實應該主動加強教育，同時改善城市及馬路設計等配套，推動「單車友善」社區：「香港地少，人多車多，呢個係要推行單車嘅原因。地咁少，仲整咁多馬路，迫咁多車落黎？一個社會容納唔到單車，呢個社會都幾令人沮喪。」
裝備要齊全 練好基本功
如欲在市區以單車代步，Uncle Moon提醒大家要做足安全措施，如戴頭盔，穿鮮色或反光衣物，單車要有車鈴、頭尾燈及煞車掣。他亦建議車友盡量避開多車路段：例如在港島，可沿海邊龍和道等路段一直踩，避開繁忙的軒尼詩道；如要從旺角到深水埗，可以踩入內街，如楓樹街等，避開彌敦道；要往九龍東，則可踩入較少車的工廠區，或經啟晴邨、麗晶花園旁的路段，避免駛經龍翔道、太子道東及觀塘道等；車友亦可善用單車的靈活性，如推車過商場、上天橋，到達較少車的地方才繼續踩。
最後，Uncle Moon強調應先練好基本功才踩出馬路，如轉彎、定車、打手勢、學會運用波檔及頭尾煞車掣等等。如想在馬路練習，Uncle Moon建議可在較少車的路線實戰，如由樂富邨往觀塘碼頭，深旺道、渣華道等亦適合初學者練習。