英國嘅足球流氓就出晒名，喺今屆歐國盃，英格蘭（白衫）同威爾斯（紅衫）仲要同組，搞手法國都驚驚，所以下令禁酒！英格蘭對威爾斯場波會喺下月16號、喺朗斯舉行。法國警方話，由當日朝早六點起嘅24個鐘，朗斯市中心禁酒。由於朗斯只係小城市，警方呼籲冇飛嘅球迷就唔好嚟，以免引起混亂。另外，英格蘭前鋒占美華迪噚日同女友碧琪結婚，但華迪嘅五歲囡囡艾娜就冇得去做花女。艾娜係華迪同前妻所生嘅女，家陣由前妻照顧；由於華迪嘅雙親唔多滿意前夜店女公關碧琪嘅過去，所以佢哋都一樣冇出席華迪嘅婚禮。