應屆亞洲冠軍歐鎮銘讓半臂都贏！唔係講笑㗎，世界排名26嘅歐鎮銘，噚日喺港會舉行嘅港會國際職業壁球計分賽男單首圈，雖然因車禍而撞傷右膊，只係郁到前臂，但都以3:1贏巴基斯坦球手阿斯林，殺入今日八強。
右膊受傷僅前臂郁到
「其實今日大部份技術都做唔到，右手唔可以好大幅度咁活動，只能夠郁到前臂，出球嘅力度同角度都比平時差好遠。」五月頭，歐鎮銘喺香港踩單車嗰陣，俾一架私家車撞跌，傷及右膊，好彩照X光後發現冇骨折，但已經令佢打唔到本月中嘅台北亞洲壁球團體賽，所以噚日呢場係佢俾車撞傷後嘅第一場比賽。
歐鎮銘又話：「膊頭傷已經好得六、七成，今日好彩都打到一啲細力波。我參加呢個比賽主要係想測試膊頭好番幾多。聽（今）日比賽，我都係以唔畀對手撞到為主，唔想再傷到膊頭。」佢今晚六點嘅八強會對埃及球手雷達。
噚日嘅比賽係免費入場，吸引到唔少球迷入場睇波，歐鎮銘嘅媽咪亦係座上客；至於同日較早時間贏咗女單首圈兼力爭衞冕嘅歐詠芝，亦留喺度幫細佬打氣。世界排名第10嘅歐詠芝，噚日喺女單首圈同師妹廖梓苓鬥足五局，終以3:2險勝，今日下晝五點對世界排名16嘅英格蘭球手鄧卡芙。另外，上個禮拜滿28歲嘅陳浩鈴就喺女單首圈，以1:3輸畀世界排名第九嘅新西蘭球手祖姬芝。