利物浦喺周二落實由德甲緬恩斯收購門將卡利奧斯，相信唔少紅軍迷都讚好，終於有機會唔使再由後防炸彈米洛列特把關。不過有班非紅軍迷都一樣畀like，事關呢位22歲德國門將靚仔之餘，仲有型格紋身吸睛，未喺英超亮相先迷倒女粉絲。
未試過失誤累球隊失波
緬恩斯喺上季德甲長時間係爭逐歐聯參賽資格分子之一，卡利奧斯自然功不可沒。全季聯賽上陣34場失42球，聯賽失球率其實同米洛列特一樣；不過74.1%撲救成功就好過後者，更重要係卡利奧斯全季未試過因為佢嘅失誤導致球隊失波，而米生就有四次累紅軍失波，有個穩陣啲嘅門將，利物浦喺下季英超要捲土重來都有把握啲。原來佢都唔係第一次加盟英超球會，09年當佢16歲嗰陣，由史特加轉投曼城，但冇乜上位機會，兩年後就返咗德國加盟緬恩斯；亦因為效力過曼城，佢同𠵱家名義上仲係紅軍球員嘅巴洛迪利仲係朋友。
JB主動搭訕全因靚紋身
卡利奧斯好唔好波仲未知，但佢嘅加盟就令紅軍整體顏值提高唔少，六呎二吋身高加上俊朗外貌，仲有佢啲紋身圖案一樣養眼，心口有對比翼雙飛。亦因為紋身令佢喺上年結識咗加拿大歌星Justin Bieber，後者喺酒店泳池見佢啲紋身咁靚，就自動走埋去搭訕，之後交換電話做埋老友。除咗Bieber，相信卡利奧斯將會冧到唔少女球迷，唔少女粉絲已經喺社交網站度話要贒實佢。對於靚仔門神加盟利物浦，本身係紅軍球迷嘅鄧洢玲（ 阿旦 ）就相信紅軍嘅女球迷人數一定會上升喎。