每年六四會到維園參與燭光集會嘅新民主同盟，今年亦唔例外，仲推出5款由「咖喱范」范國威親自設計嘅產品籌款，包括「我係香港人」運動納米毛巾、文青feel四方環保水樽，而當中最搞笑，要數寫有「特事特辦」字樣同龍蝦圖案行李牌、A4文件夾、便利紙條。若想集齊上述5款紀念品，捐款300元就得嘞。王珮芝話唔少內地廠房睇到毛巾要印上「我係香港人」都唔敢接單，龍蝦圖案行李牌仍製作中！但咖喱范其後向八方補充，記者會上展示嘅四方水樽或有版權問題，佢決定叫生產商轉用普通圓筒形水樽，最壞情況係損失訂金。