現年72歲嘅金朝陽（878）創辦人傅金珠（陳太），雖然係公司主席，但近年已經退居幕後，好少高調現身，多數由寶貝女陳慧苓處理對外事務，佢對上一次以集團主席身份出現，已經係2014年底銅鑼灣金朝陽中心二期Midtown開幕儀式。
事隔年半，難得陳太噚日再以金朝陽主席身份出現，講解公司發展方針。陳太原先只係話淨係影張相，最後傳媒問佢公司大方向同經濟前景，佢都有問必答，睇落心情十分好。
查實佢對仔女陳慶達與陳慧苓，已經幫手打理公司超過10年，傳媒問陳太，會唔會打算完全交棒畀對仔女，自己退休嘆世界，陳太就話「公司係自己一手創立，返去好似消遣咁，所以唔覺得返工辛苦」。唔怪得本地多間家族企業嘅老人家咁鍾意返工喇，明晒！