民建聯「粗口大狀」馬恩國率領嘅訪京團爆出夜蒲攬女事件，加上引述中央官員「槍炮論」捱轟後，喺建制派陣營即時眾叛親離，唔少建制派中人即時割席，但曾經同馬恩國多次公開激辯嘅法政匯思召集人任建峰（Kevin），卻雪中送炭，噚日喺facebook為剛做完切除腫瘤手術嘅馬恩國送上祝福，祝佢早日康復，仲留言「還有很多議題等著D9你」。馬恩國好滾動，以流淚emoji公仔回應，仲回覆話︰「Love you, Kevin!」
任建峰同八方講，同馬恩國無任何私交，過去只曾喺電視同報紙訪問同場激辯，今次留言問候，純綷因為覺得爆出「夜蒲團」事件後，唔少建制派即時割席，馬恩國政治生涯可能暫告一段落，「我覺得出得嚟做嘢，政治與健康（之間），健康係重要，見到佢兩個腫瘤，係幾核突，唔係細手術，仲要處理咁多危機，我覺得唔應該踩得佢太盡，最多等佢復元後，大家再拗過一餐。」
「論賤格未輪到佢」
任建峰仲話，如果論無恥賤格，「我遇過嘅建制派中，有排都未輪到馬恩國」，話見到梁美芬突然話要退出馬恩國嘅中澳法學交流基金會真係「好核突」，「佢同涉事其中一個律師，多年來喺地區工作有合作，點可以做到咁？」佢話喎，馬恩國流淚嘅emoji公仔，可能係因為喺一班「怪獸」中突然聽到佢一句人話喎。
李八方
mailto:[email protected]