人到中年，唔經唔覺已經到四字頭，好多陪伴成長嘅童年回憶已經漸漸消失，好似大型機舖一間一間摺埋，繼銅鑼灣後，九龍灣又有大機舖唔做，大型卡拉OK亦都越嚟越少，糖街招牌K店亦開始縮，坦白講，自己都大大話話有十年八年冇唱K，記得中、大學時代都算係唱K最旺日子，尤其係當年新歌會由某某卡拉OK獨家試唱，仲會鋪天蓋地賣廣告宣傳，你想唱Eason就要去C記，想唱容祖兒就要去N記，少啲記性都會去錯㗎。
講起獨家，曼聯新一季好大機會由摩連奴接手，各大傳媒又吹佢有幾多億鎊買人，不過講真，摩連奴一向有御用進口商：文迪斯（右）。文迪斯呢位「葡萄牙Paco」，手上唔少葡萄牙同效力過葡超嘅球星，連摩連奴都簽埋佢，互相照應，想要咩人文迪斯都幫到手。戰友咖喱就話，摩連奴買人眼光好過雲高爾，當然呢啲都只不過係九十步笑一百步，冇錯文迪斯旗下好似C朗、迪馬利亞、比比等，都算係好貨色，但都要摩連奴硬食唔少貨尾，好似上季車仔借用法卡奧，簡直係笑話。
𠵱家文迪斯手上又有貨，就係祖奧馬里奧，呢位23歲中場效力士砵亭，雖然士砵亭死都唔想賣，不過買斷價只係6,000萬歐元，曼聯同車路士都爭緊，摩連奴入主曼聯後，搶人都易啲；不過佢係咪好嘢，就要睇過先知喇。文迪斯旗下仲有門將迪基亞，曼聯要不是迪基亞鎮守後防，上季可能連第五都冇；呢位西班牙門將多次傳出想去皇家馬德里，不過如果文迪斯幫手，勸佢留隊就易好多。
文：牽牛