摩連奴做曼聯領隊，佢會買咩人？睇番佢以前教波嘅經歷，相信好大機會益番自己友文迪斯，喺呢位球壇超級經理人麾下揀卒。好多球迷以為文迪斯係洪水猛獸，覺得佢實搵曼聯笨，但老實講句，佢旗下有唔少好球員，如果買得到，曼聯應該開心先啱。
最為曼聯球迷熟識嘅文迪斯系球星，當然係基斯坦奴朗拿度（C朗），如果靠摩佬同文迪斯嘅關係可以帶C朗返奧脫福嘅話，會對曼聯嘅軟實力有好大幫助，除咗吸引更多商業贊助外，仲可以用C朗做餌，吸引更多頂級球星加盟。不過，皇家馬德里係球壇中最着重軟實力嘅球隊，又唔等錢使，除非佢哋搵到一位拍得住C朗嘅球星，唔係又點會放人吖。
睇番文迪斯個客戶名單，仲有唔少筍貨，包括葡萄牙兩大中場新星，一個係連拿度辛捷士，另一個係魯賓尼維斯（右二）。拜仁慕尼黑就醒目喇，趁曼聯仲係立立亂嗰陣，先一步簽咗原效賓菲加嘅辛捷士。19歲嘅魯賓尼維斯就仲喺波圖，等緊大會斟，佢嘅履歷好勁㗎，打破C朗紀錄成為史上最年輕踢歐聯嘅葡萄牙球員，仲做埋歐聯史上最年輕嘅隊長；之前基斯甸泰路踢波圖嗰陣，話尼維斯踢法似巴塞隆拿嘅布斯基斯，勁食腦，其實幾啱買嚟接卡域克嘅班。
睇曼聯今季嘅表現，應該買番隻右翼，而文迪斯手上都有一個可行之選，就係摩納哥嘅貝拿度施華。貝拿度施華仲係21歲，大把潛力，舊年夏天踢U21歐國盃擔任葡萄牙進攻核心，幫球隊贏咗亞軍。今季佢喺摩納哥都有七個法甲入波，表現都唔錯。
文：咖喱