呢屆立法會會期就嚟完結，唔少議員玩埋呢屆就退休，而約28名建制派議員噚晚大會結束後，每人夾200蚊請政務司司長林鄭月娥食晚飯，若然唔夠，就由民建議譚耀宗包底！林鄭赴會時被問到有乜同議員傾時，只係笑笑口話：「今（昨）日係議員請我嚟㗎！」然後就進入宴會廳準備開餐。
議員喺開飯前都異口同聲話，噚日立會開會好順利，幾乎冇點過人數，林鄭只係微笑未見插嘴，唔知係咪因為當時有傳媒在場？皆因傳媒影完相離開現場後，林鄭係有開腔訴心聲。
有與會者引述被認定係下屆特首黑馬嘅林鄭話喎，近日開始同好多人食飯，但強調只係告別同感謝宴，絕對唔係為咗拉票，似乎唔想某啲人誤會。唔通佢驚若然有疑似拉票行動，就會有黑材料流出，都係低調啲好？據知林鄭希望逐一宴請建制各黨到官邸用膳，但佢下月會放假出埠，所以要到7月先進行。