積極考慮參加立法會新界東選舉嘅上水鄉事委員會主席侯志強，噚日晏晝喺立法會餐廳同自由黨榮譽主席田北俊嘆下午茶。八方向田少查詢過，佢引述侯志強話，不論最終係咪組得成黨、參選係輸定贏，都積極考慮出選，對方噚日主要問下佢意見，想知報名時須留意乜嘢喎。
田少話侯志強一日未報名，一日都係自由黨員，但報名參選後，就會以新政黨名義出戰；雖然田少唔想侯志強退黨，但覺得既然佢想參選，冇理由阻佢，但已叫侯睇定啲，若最終唔報名參選，歡迎繼續留自由黨。
田少仲話，侯暗示至今未組成新政黨係因一啲「政治因素」，田少相信對方所指不外乎係中聯辦同特區政府，主要唔想侯志強一旦組黨參選，會分薄建制派啲票喎。