中電信（728）新任董事長楊杰噚日首次以董事長兼首席執行官身份，出席股東會，楊杰好有心思，為股東準備「甜頭」，就係一份寫住「亞洲第一」嘅金牌與獎盃曲奇，仲係搵謝霆鋒嘅「鋒味曲奇」去做，公關話係寓意同股東分享甜頭。
呢份曲奇，望落有真係幾金碧輝煌，但正正就係呢份土豪金嘅味道，即使係謝霆鋒出品，華華亦都冇勇氣食佢哋落肚，好在小股東就幾受落，對新任董事長呢份禮物都相當滿意，起碼冇人投訴。
講番楊杰，佢2004年已經加入中電信做執董，2011年做到總裁兼首席運營官，舊年前董事長常小兵出事落馬，都係由楊杰一直做代董事長。
噚日被問到坐正感想，楊杰只答「抬頭看路，低頭拉車」。