前日謝瑞麟（417）業績會上，首次只得主席邱安儀，同埋舊年中加盟嘅副主席伍綺琴兩位女將主持大局，華華仲以為負責業務嘅副行政總裁陳立業有事在身，所以缺席。點知事隔一日，公司就公佈陳立業將於今年6月離職，原因係為咗個人發展喎。
過去多年，謝瑞麟班底甚少變動，一直由主席邱安儀，搭住陳立業同首席財務總監黎子武見人。但短短一年間，黎子武喺舊年8月同樣因個人發展離開，家陣連陳立業都走埋，可謂大換班！
相反，碧桂園（2007）前女掌櫃伍綺琴就越做越高級，舊年7月加盟，職務只係首席策略暨財務官兼公司秘書，12月就入董事局做執董兼副主席。黎子武與陳立業相繼走人，唔通同伍綺琴唔多夾？