巴塞隆拿由上季三冠王變成今季雙料冠軍，過程一啲都唔易，西甲鬥到最後一周先至力壓皇家馬德里封王，到周日西班牙盃決賽，更有中堅馬斯真蘭奴早段紅牌，加上前鋒蘇亞雷斯傷出，結果去到加時先以二比○擊敗西維爾，取得球會第七次雙料冠軍，阿蘇賽後就派定心丸，話應該影響唔到出戰百周年美洲盃。
十人奮戰加時挫西維爾
今季巴塞贏西甲，西維爾就贏咗歐霸盃，周日呢場喺馬德里卡達朗球場上演嘅決賽，邊隊贏就可以做雙料冠軍。呢幾年西班牙盃都涉及唔少政治爭議，上年決賽雙方巴塞同畢爾包球迷就齊齊噓國歌，結果被罰款，今次巴塞球迷就上訴成功，可以帶代表獨立嘅加泰隆尼亞旗入場，不過據報負責直播決賽嘅電視台就河蟹，刻意避免特寫揸加泰旗嘅巴塞球迷。
講番場比賽，牌面上巴塞遠勝西維爾，但過程並唔係一面倒，36分鐘馬斯真蘭奴喺禁區頂拉跌單刀嘅西軍前鋒加美路，被紅牌直接驅逐離場。巴塞後防失去大將，到下半場更加大鑊，今季西甲神射手蘇亞雷斯56分鐘拉傷大腿，要由巴西小將拉芬拿艾簡達拿入替。大部份時間以寡敵眾嘅巴塞，頂得住西維爾之餘，尼馬更喺補時階段博到對手中場班尼加侵犯，後者同樣紅牌被逐。到加時階段，西維爾再有中堅丹尼爾卡列高兩黃一紅逐，巴塞最終憑翼衞佐迪艾巴及尼馬各建一功，以二比○勝出，第28次捧西班牙盃冠軍，繼續成為「西盃王」。
「不影響我代表國家隊」
巴塞捧盃，最唔開心或者係烏拉圭球迷，事關佢哋擔心蘇亞雷斯受傷會唔會影響出戰下月初舉行嘅美洲盃；阿蘇賽後換番套運動裝捧盃，仲喺Ig留言：「冠軍，很開心又拿多一個冠軍，我要等待明天檢查，相信不會有事，不影響我代表國家隊比賽。」今次係巴塞第七次成為本土雙料冠軍，以隊長身份捧盃嘅恩尼斯達就話：「今場雙方都拼到盡，能夠成為冠軍，係今季完美句號。」歐洲主流聯賽都煞科，亦產生唔少多料冠軍，好似拜仁慕尼黑就包辦德甲同德國盃，祖雲達斯就贏意甲同意大利盃，最威就係巴黎聖日耳門，成為法甲、法聯盃同法足盃本土三冠王（見附表）。
