香港好多老牌公司開股東會都會請小股東吃番餐，恒地（012）旗下的香港小輪（050）噚日亦唔例外，股東會喺集團旗下的美麗華酒店舉行，香港小輪安排咗30幾圍畀股東食中菜，但由於股東會入場登記時間只得15分鐘，搞到有成20位遲到的小股東無得入場好不滿。
自助餐有生蠔龍蝦
恒地系在香港屹立咁多年，應對小股東自然有一手，這邊廂小股東躁底，另一邊廂公司發言人已經向香港小輪主席林高演請示完，即時傳話，下令要幫遲到的小股東好好安排。
據講林高演話「恒地是香港老牌公司，好有人情味，唔可令小股東長途跋涉嚟到無得食！」所以即時安排股東到下層的西餐廳YAMM，享受價值逾300元的YAMM自助餐招待。
發言人話，原來香港小輪股東會一向只得15分鐘登記，遲到的股東入場已投完票，入場都無意思。
但主席唔想小股東白行，所以安排了20位遲到股東食自助餐。和準時的股東待遇唔同，怕唔怕有比較先？發言人就好肯定咁話，其實股東會內食的中菜一啲都唔平，有番咁上下。而睇番YAMM的官網，餐廳提供日本、印度、東南亞等不同菜式，仲有波士頓龍蝦及即開生蠔，相信小股東條氣順晒啦。
發言人仲話，今年股東會已開足34至36圍，每位12個人都唔夠位坐，即是至少有400名股東捧場，由於美麗華已經是恒地旗下酒店，較易安排，下年會再檢討吓點做得更好，務求令股東開心。
李華華
mailto:[email protected]