李城班球員雖然喺泰國冇得飲酒，但禮拜三喺隊友占美華迪個婚禮上可以飲番夠本。
英格蘭禮拜日喺主場友賽對土耳其，為今夏歐國盃決賽周做準備，結果憑兩大射手哈利卡尼同埋占美華迪（華Dee）各入一球贏2:1；而英軍領隊鶴臣仲證實，華Dee由於喺禮拜三結婚，所以唔會參加禮拜五對澳洲場友賽，之前同之後嘅練習亦都唔會出席。鶴臣話：「華迪原本喺六月結婚，但係因為我選咗佢參加今夏嘅歐國盃決賽周，所以佢惟有提前舉行。」華Dee嘅前女公關未婚妻碧琪日前接受訪問時自爆，已準備大量嘅酒同賓客「隊」過，所以李城班球員完成泰國之旅返嚟出席華Dee個婚禮嗰陣，肯定不醉無歸。估計華Dee會飲到啤啤夫，唔怪得鶴臣畀佢放成個禮拜假啦！
另外，土耳其教練泰林真係識得擅用科技，事關哈利卡尼幫英軍先開紀錄嗰球有越位之嫌；佢喺手機cap咗哈利卡尼越位圖畀助理球證睇；助理球證睇完之後冇理佢，仲想充公佢部手機。
