李斯特城班球員喺泰國又出事！好彩今次唔係嫖妓兼拍埋片，而係喺禁酒日疑似飲酒囉。
李城班主係泰國人維猜，佢哋爆大冷贏咗今季英超冠軍後，今夏梗係要去泰國見高僧同埋勝利巡遊啦。禮拜日領隊雲尼亞里同班球員去咗緬甸見高僧，之前就留咗喺泰國幾日，班球員仲趁機喺曼谷啲度假酒店嘆番吓。上周末係泰國衛塞節，呢日亦係禁酒，但係李城班球員包括正、副選門將卡斯柏舒米高、舒華沙、後衞賀夫同埋中場恩拿等，喺個泳池一邊吹水一邊飲嘢，雖然英國有小報話佢哋飲酒，不過我求大俠就覺得佢哋飲緊可樂似啲，事關佢哋手中杯嘢飲除咗有冰同埋飲管之外，顏色仲係黑黑哋，望落似汽水多過酒精飲品囉。
李城舊年暑假訪泰嗰陣，陣中三個小將包括前領隊皮亞臣個仔占士皮亞臣一齊召妓兼喺酒店大玩群交，搞到滿城風雨，皮亞臣亦因為咁而冇咗份工，所以今次舊地重遊，佢哋班球員應該會好醒目，唔敢喺老細地頭度亂嚟囉。