張德江上周來港時，率領社民連掛起橫額表達港人訴求嘅社民連主席吳文遠，知名度急升，有剃鬚刀牌子仲乘勢抽文遠大將軍嘅水，叫佢快啲剃咗鬚先講。查實身為丐幫幫主嘅吳文遠浸鹹水多年，當年未有鬍鬚時，係名牌大學讀雙學位嘅高材生。
39歲嘅吳文遠細個喺元朗讀幼稚園，之後到九龍讀小學，再過赤柱讀聖士提反書院，初中舉家移民新西蘭，之後到澳洲墨爾本大學攻讀機械工程同精算及財務雙學位課程。本來佢獲英國倫敦商學院取錄讀MBA，點知讀咗幾個月就獲跨國大企業招攬，文遠覺得MBA課程嘅內容嚟嚟去去都係咁，好多嘢佢都識，決定投入職場。
文遠那些年讀書真係幾叻，求學時考試頭10名實有佢份，最叻係設計同數學呢兩科，本來諗住入大學讀建築，但決定將設計留番做個人興趣，改讀工程、精算。睇番佢喺外國生活時嘅舊相，住大屋又養番狗，查實佢喺香港應該着西裝揸靚車飲紅酒遠離政治，何解入丐幫瞓身抗爭？文遠話，香港好多問題都可以解決，讀咗咁多書，豈能坐視不理？