「金句王」黎大鈞舊年8月離開數碼通（315），行政總裁呢個位邊個接手呢？噚日結果終於出爐，就係由MasterCard香港及澳門區總經理葉安娜（Anna）接任，每年總酬金有1,000萬元！
今年46歲嘅Anna，喺中大BBA畢業之後，就去咗牛津大學讀管理學碩士同哲學博士。
Anna係支付業務嘅專家，前年先獲委任為MasterCard港澳區GM，兩年後就俾人挖咗去數碼通，可以證明𠵱家電訊業，除咗喺手機月費、寬頻上網領域吸引客戶課金之外，仲要開拓新戰線──就係流動支付領域。
究竟Anna加入數碼通可以帶嚟咩化學作用？其實從香港電訊（6823）舊年推出嘅拍住賞可以看出一啲端倪，獨家同MasterCard合作，食咗儲值支付業務呢個市場頭啖湯。
自從金句王走咗，遺作「KISS」都難產，相信Anna嘅首要任務，係繼續KISS，啜。