上星期五寫換領導，及1989年六四期間，佐丹奴發售一款T恤，上有六個字：李鵬，請你下來。當日就收到幾位當年曾參加百萬人大遊行嘅朋友來電：「喂！你寫錯咗嘞，應該係：您好，請您下來。」跟住有權威人物來WhatsApp：「您好，請您下來。鄧小平閱軍時向軍人頻頻高呼：『你好，你好』，你好就係指鄧小平」。
經權威人士指點，就想起T恤設計師嘅原意係想叫鄧小平下台，而唔係叫李鵬下台，鄧小平就係下令鎮壓清場嘅無名銜最高領導人，李鵬只不過係聽話總理而已。權威人士本來話，提醒你啫，未必要更正嘅，不過左丁山前星期遇到兩位年輕人，係本欄長期讀者，講起嚟，常以為左丁山係「權威」，令左丁山為之一驚。第一位A君與左丁山談及佳士得要拍賣一百一十幅黃永玉之梁山好漢畫像，據知黃永玉直指批畫作係假貨。A君上Google一打「黃永玉假畫」，就搵到本欄2013年一篇關於民主黨拍賣黃永玉作品之事；第二位B君在一個工作坊頒獎禮碰到，B君係中大新聞系二年級學生，佢話自小學識字之後就睇「GG細語」，從中學習攞料。
咁講法，即係話本欄如果有錯而唔更正，可能誤導不少長期讀者，特別係年輕人，以致佢地以訛傳訛，一想到呢點，唔更正唔得，謹向讀者講句：鎖你鎖你。
寫稿之時，電視直播蔡英文宣誓就任台灣的中華民國總統，走出總統府時，有不太齊整，不太雄壯，亦唔係好多人一齊呼喊嘅口號：總統好。即時諗起，乜咁大陸feel呀，聽落有啲突兀。世界上嘅女總統女總理，唔少都係捨裙取褲嘅，朴槿惠、默克爾夫人，以至「準總統」希拉莉，每在公共場合出現，總係穿褲子，不要裙子，蔡英文亦不例外，咁多年來未見過佢在鏡頭前着裙。呢日見蔡英文率領新內閣官員宣誓就職，總統穿着得似一位普通香港OL，全無貴人之相，完全無法與香港鄧蓮如、陳方安生，以至今天的林鄭月娥比較，相差好遠噃。講謙卑，都唔使衣着咁寒酸，自貶形象嘅啫，你係總統喎！副總統等等男士只係穿普通西裝，與日本內閣閣員就職時之全套燕尾大禮服相比，更加冇氣勢，總統與內閣就職，係國家大事，不可無「禮」也，今禮失求諸野，但中國人仲未識得向日本學習！