人大委員長張德江來港視察，香港警方如臨大敵，生人勿近。同樣國家領導人出巡，總理李克強喺自己地頭的表現就親民好多。新華社昨日發佈佢視察湖北十堰東風汽車廠相片，見佢走入廠房同工人傾偈，仲企喺生產線旁，揸住油槍同重型卡車入油，表示要為東風汽車加油、為中國製造加油喎。雖然可能係擺pose做姿態，但總好過有啲領導，全程只會板起面孔，高高在上啦。
東風集團（489）昨日升3.56%，A股升6.82%。不過，呢啲領導人視察效應，股民如果認真就輸了。事關2015年7月17日，國家主席習近平視察中車（1766），當日A股應聲升6.64%，H股升2.9%。但之後股價好快跌回原形，中車A股昨日收報9.1元人民幣，比習近平視察當日收市價18.31元，已經跌咗超過5成。