民主黨主席劉慧卿嘅長壽網台節目《議會內外》上年底因為網台摺埋而無聲無息結束咗，但查實節目結束前，卿姐邀請過惹火尤物、港大校務委員會主席李國章同佢真情對話，點知亞瑟王一直未找數，直至最近竟然答允同卿姐共處一室……對談箒，做過記者嘅卿姐即時自掏腰包攞幾千蚊租場，重操故業搵亞瑟王復播《議會內外》，一次咁多啦！
由卿姐主持嘅《議會內外》係網台OurTv嘅王牌節目，已經有長達6年歷史，卿姐定期搵嚟政治猛人做訪問；但網台結束後，節目亦玩完，點知卿姐最近再搵李國章，對方竟然兌現承諾接受訪問，所以就算冇咗OurTv嘅錄影廠，佢都攞咗幾千蚊喺觀塘租場為李國章「復播」，以全新廠景會一會亞瑟王。面對面談心，最好講啲乜？卿姐同八方講，梗係港大管治問題啦！
唔會八卦「翻版法拉」
近月facebook直播成為趨勢，卿姐話諗緊透過fb直播今次節目，等人人都有得睇。花生友梗係關心，卿姐會唔會問吓亞瑟王嘅第二春「翻版陳法拉」？卿姐反問八方，佢嘅女友同港大管治有乜關係？笑言真係問唔出口！
不過卿姐又話喎，亞瑟王承諾節目完咗會接受傳媒訪問，換言之傳媒到時可以問到夠啦！
李八方
mailto:[email protected]