民主黨主席劉慧卿向來關心人權問題，每年都會遠赴聯合國人權公約委員會，表達香港喺人權工作嘅問題，卿姐（圖）噚日就去咗Para Site藝術空間參加關注外籍家庭傭工嘅藝術展覽《工餘》導賞團，仲喺參觀後同策展人及外傭討論外傭喺香港面對嘅問題，卿姐驚訝展覽中嘅部份畫作，畫家原來曾經喺香港做過外傭。
冇請外傭嘅卿姐話，部份外傭受到中介公司嘅欺壓，例如遭扣起護照、合約，甚至要佢哋到財仔借錢繳付中介費，外傭人權亦面對好大問題，例如放假不能全天休息。但卿姐補充，部份傭工自身行為亦有問題，搞到啲僱主雞毛鴨血。不過佢話無論如何，外傭當下最大問題係中介公司嘅操守問題，立法會人力事務委員會聽日討論「職業介紹所實務守則草擬本」，卿姐到時會發威，為僱主、外傭發聲。