現在做父母很難，懷胎十月未出世已要諗定仔女參加乜playgroup、學校和興趣班，報名條龍長過彌敦道。小朋友難教，青少年更難搞，最近追看《煮吧！換咗我阿媽》感受更深。節目初得知有得賣甩阿媽，三個仔女異口同聲話「超開心」你都咪話唔心噏，經過一大輪考驗，終於患難見真情，世上不只媽媽好，仲賺多個契媽，但真實生活哪有交換媽媽計劃，家長處理與青少年的關係又應該怎樣才是最好？
鑽研親子關係的美國心理學家Laurie Hollman上年底出版的新書《Unlocking Parental Intelligence: Finding Meaning in Your Child's Behavior》就有詳細分析對應策略，以下三點，你有沒有犯過？
1）叻唔切
做咗咁多年人，難免會覺得自己食鹽多過仔女食米，又怕佢哋吸收錯誤資訊叻唔切，Hollman就話家長也要提醒自己不要太過快下判斷。每個小孩的想法也不一樣，你也未必完全了解青少年的心理，發表偉論前，先讓仔女講完心聲，有難題就一起討論解決方案，唔好逼到佢哋乜都收收埋埋。
2）「我為咗你好先____」
正值青春期，乜都特別敏感，你可能只想他吃得健康有營，勸他小吃零食、加工食品，他就可能解讀成連爸媽都覺得自己肥，轉個頭走去減，弄巧反拙。不是叫家長乜都唔鬧，令仔女變溫室港孩，不過言談間要當這些小大人做朋友，戒掉說教的口吻，你也不會貿貿然跟同事講：「喂你識唔識食㗎，咪亂食嘢，好心你食多啲有營養嘢啦，我為咗你好咋大小姐！」
3）掛住做自己嘢
手機響響響，冇時停，又要忙工作、忙家事，每天要處理的雜務做極都唔完，自己休息也沒時間。雖然很難，但再忙也好，要提醒自己偶爾為子女停下來，他們有時在煩，再瑣碎也好，先放下手機聽一聽。不要讓他們覺得只有你的事才是正經事，Hollman說：「工作雖然重要，工作會有退休的一天，但老來時還有子女在身邊，所以我永遠也以母親這份工作為先。」
記者：馬朗澄