第四場1200米三級賽沙田銀瓶，既係這天遮打盃賽日首項戲肉，亦係季內最後一項短途分級賽，在姚廐「有得威」賽日早上退出後，只餘八駒上陣。
告東尼馬房的「幸福指數」，上仗重配蔡明紹跑主席短途獎得尾二，隔咗三個星期今場再跑，人馬合作卻由蟲變龍，強勢勝出捧盃之餘，更成為告東尼與蔡明紹師徒季內首匹田草合作頭馬。亦是蔡明紹自2013年5月「加州萬里」贏遮打盃後，三年來他首度贏級際賽。
「幸福指數」今場2檔起步，沿途守好位咬實放頭馬「發盈喜」跑，直路一加速即以勁勢脫穎而出，「幸福指數」亦繼季初由雷神勇奪國際G1香港短途錦標後，再於1200米贏大賽，在港服役增至八捷，總獎金升到接近3,200萬元。
環顧全場，其實以「幸福指數」卡士最高，事關除咗佢之外，冇馬贏過國際一級賽，偏偏閘前落飛都有5.7倍，組合獨贏開A2並都係派29元正。
大熱門1.9倍從未贏過分級賽的「華恩庭」，末段在雷神狂鞭下，都只能夠於「幸福指數」後面食塵，從未構成真正威脅，結果只跑第二。今場三、四名由一對冷馬「控制者」及「一寶」瓜分，四重彩派一萬蚊多啲。上屆冠軍「新力風」衛冕沙田銀瓶失敗，僅與「發盈喜」成平頭第五。