人大委員長巡視香港，所到之處，莫不塞車，左丁山刻意避開會展地區，未曾見過大場面，但人在中環沙田，亦可略見一二。上星期三律師T召集幾位校友到華商會飲下午茶，下午三時齊集，呢度下午茶餐抵到加零一，一碗牛腩米，只售三十九元，喺中環會所，去邊度搵呀，難怪九樓坐滿人，當然大部份係退休人士啦，或係老闆階級啦，否則下午三時許，點會有時間在會所飲茶打牙骹？
此日干諾道中近中華總商會一帶，警察處處，每二三十米就有起碼兩個，行人天橋由怡和大廈至到恒生銀行，天橋全部架上鐵欄，不准市民站在天橋旁邊瞭望，咁大陣仗，搞乜呀，唔通張德江會到中總？木宰羊。午茶後坐的士回沙田，過咗新城市廣場往馬場方向，司機突然嗌出嚟：「點解右手邊全部冇車咁好景？」一睇就知係封路不准汽車上尖山隧道啦。果然，說時遲那時快，幾十架車由鐵騎巡警開路，風馳電掣咁在右邊路上出現，之後就有大量汽車巴士貨車在後跟隨，睇怕佢地已經塞咗好耐咯。
張德江原來係到科學園觀察，聽取匯報，創新科技局局長楊偉雄講述創新科技，香港科學院創院院長徐立之教授講科研與港科院。就因為咁，科學園以至隔籬嘅中大入口都企滿警察，嚴陣以待。
科學園由超級梁粉羅范椒芬做主席，羅太素來做公職盡責到加零一，勤工獎有120分起碼，管科學園好似管自己擁有嘅公司咁着緊，俾羅太管到正嘅CEO要有好高EQ至得，2008年4月上任之陳總裁（Anthony Tan）在2013年7月退任，同年8月馬錦星（Allen Ma）接替，馬錦星以前係老電（香港電訊）高層，處事經驗豐富到極，但最近聽到消息Allen做到第三年，已經話要離職，原因不難了解，食慣私營機構飯之人，一旦食公家俸祿遇上前任高官做上司，確係難啃啲嘅，既然已不愁衣食，何必考驗自己EQ，都係回家休養好過。由梁粉做大型官方機構主席，甚為方便，打個電話，就可以特事特辦，奉旨唔會陽奉陰違。好似會展明明已接滿全年訂位，一旦大人物駕到，便特別安排預定展覽會搬去亞洲博覽館舉行，冇咗一筆大生意，貿發局除犧牲收入之外，還要遣派職員為張大人出席之論壇、晚宴做後勤，你話羅康瑞主席幾識do呢。