里約奧運仲有唔夠三個月就開幕，各界仲擔心緊巴西主辦單位趕唔趕得切搞掂啲配套，不過至少有一樣𠵱家已經準備好。賽會已經預備咗45萬個避孕套，喺奧運期間畀運動員免費任用，比四年前倫奧足足多三倍。
參加今屆奧運嘅運動員大約有一萬人，唔少選手會提早入住選手村備戰，加上有大量教練同職員等同行，奧委會今次準備45萬個避孕套，未必係太誇張。奧委會解釋今次數量比上屆奧運預多三倍，原因之一係當中佔咗10萬個係第一次引入嘅女性用避孕套，不過佢哋就冇正面回應，大幅增量係咪同寨卡病毒喺巴西當地肆虐有關。總之有備無患，最緊要安全。
保特9.98秒捷克封王
啲套套會放喺選手村唔同地方，方便運動員隨便拎，唔使跑得快先有套派。講到跑得快，又有邊個夠膽話自己快得過保特；將會喺里奧挑戰連續三屆贏百米金牌嘅牙買加飛人保特，上周五喺捷克田徑賽以9秒98贏咗百米跑，係佢今年首次跑10秒內，保特賽後話自己感覺唔錯，相信狀態到奧運會到巔峯。