美洲國家盃六月初就揭幕，唔少參賽國家隊陸續落實大軍名單，大熱門阿根廷上周五就公佈最後23人名單，美斯、阿古路、希古恩同迪馬利亞等明星當然入圍，較意外嘅係前鋒保羅戴巴拿同泰維斯雙雙落選，特別係祖雲達斯前鋒戴巴拿今季累積19個意甲入球幫祖記衞冕，但都係冇份，應該係等佢叉足電踢奧運。哥倫比亞亦公佈大軍名單，皇家馬德里中場占士洛迪古斯就當然有份，但轉投恒大嘅積臣馬天尼斯，同上季喺車仔傷多過踢嘅法卡奧，就未能入圍嘞。