恭喜前利物浦主帥羅渣士搵到新工，佢啱啱同蘇超班霸些路迪簽約一年，嚟緊新球季仲有機會帶隊踢歐聯！網上有紅軍球迷就擔心，假如羅渣士帶到些路迪入歐聯分組賽，冇得踢歐洲賽嘅利物浦肯定俾人抽到水都乾。
來屆領些路迪踢外圍賽
羅渣士喺季初俾利物浦炒魷魚，之後就專心做包租公，嘆吓世界，順便等吓有冇筍工出現。喺上周五，蘇超班霸些路迪突然宣佈，請咗43歲嘅羅渣士做領隊，雙方簽約12個月。據報，些路迪考慮過莫耶斯同堅尼，但最後揀咗羅渣士。羅渣士喺北愛爾蘭出世，喺威爾斯嘅史雲斯闖出名堂，之後到英格蘭教利物浦，如今仲去埋蘇超，真係足迹踏遍英國！佢喺聲明度話：「好開心做些路迪領隊，我會為新工作全力以赴，為球迷帶來刺激同具娛樂性嘅勝利足球。」佢星期一就會喺些路迪開上任後首個記者會。
球迷毆鬥利物浦遭檢控
網上嘅紅軍球迷都有討論羅渣士脫離失業大軍，唔少人都祝佢好運；雖然格拉斯哥流浪下季重返蘇超，但相信改變唔到蘇超一家獨大嘅局面，話唔定羅渣士會快過利物浦贏得聯賽冠軍。亦有紅軍迷擔心，萬一羅渣士下季可以帶領些路迪打入歐聯分組賽，高路普同利物浦應該會俾人狂抽水！紅軍上周三喺歐霸盃決賽輸畀西維爾，唔單止冇盃捧，下季仲冇歐洲賽踢，反而羅渣士嘅些路迪可以憑蘇超冠軍身份踢歐聯外圍賽；更慘係利物浦因為有球迷喺歐霸盃決賽賽前同西維爾球迷打交，家陣俾歐洲足協檢控。
另外，歐洲足協上周五公佈今屆歐霸盃最佳18人陣容，利物浦有中場安利簡恩同菲臘比古天奴入選。至於冠軍西維爾當然係大贏家，有七個球員入選，包括射手加美路、中場班尼加同基祖華克等。