我不是科技專才，對科技係一竅不通，身邊有好多不同搞startup的朋友，好有宏大志願，想創一番事業，佢哋不時都會感嘆點解香港的科網土壤及不上美國矽谷之類。因為我係金融佬，冇乜創業思維，又冇落手落腳做，所以冇乜大感覺。直至早幾個星期，我見到美國Amazon行政總裁Bezos在二級市場三日內沽6.71億美金，成50幾億港元。我開始有感覺了。香港真係比不上美國。
創業家的思維係考慮點將門生意做大，金融佬的思維係做刁的思維，冇咁大願景，只會考慮幾時入場投資，幾時沽貨離場。美國的市場夠流通量、夠深夠廣，可以一嘢消化大量沽盤，香港暫時未有一隻科網可以短時間消化咁大量的貨。從呢一個角度去睇，美國市場贏了香港。
香港的金融佬對科網概念情有獨鐘，好視乎係金融食物鏈的上層定低層。上層的金融佬通常是考慮把科網當成工具做收購合併買賣，貪其估值容易判斷。最近認識了一位姓黃的收山會計師，科網熱潮時跟一位蔡姓的證券商老闆啤了一間起始資金200萬元的科網公司，後來竟然谷高過2.2億的估值，而且係冇audit account。當然這支歌仔已成絕響，不過用科網概念做工具炒股票卻是一流的操作。
如果你係做底層，玩法有唔同，有金主玩法亦有入股玩法。科網概念成形前，通常要資金支撐。金主玩法係以可換股債券方式借錢，由金主出錢打本，如果上到市的話，這手CB就會在市場上脫手，就算上不到，CB也要付息，到期就要找數還本金，這是比較吸血以及進可攻、退可守的做法。另一種是入股，入股通常會參與公司運作，提供經驗、配套、資金等，對業務的成長應該係比較好。
有時因為金融佬的短視，又或者其他原因，好多科網公司都太早上身。唔計啤殼，科網上市的好處係多一個融資平台，因為科網前期真係要燒錢，但太早上市就意味估值會被市值定位，要做大就變相更難。這是一個雞先蛋先的問題，因為無融資平台，就少一門方法找資金；太早上市，壞處是影響公司找基石投資者的發展。至於講到遇人不淑的經典，應該係IGG（799），這門生意一開始上創業板是浪費了，到底係後面的ibanker唔識做，定係想早上市早撈油水，那就不得而已了。
渾水
http://www.facebook.com/muddydirtywater