俄超上周六煞科，「俄羅斯李斯特城」羅斯托夫始終未能創造奇蹟，雖然自己做足本份，作客泰歷克憑諾保亞同耶洛堅各建一功贏2:0，可惜同日莫斯科中央陸軍（CSKA、圖）憑中場迪沙高耶夫一箭定江山，作客贏魯賓卡山1:0，以30戰65分重奪失落一季嘅冠軍。羅斯托夫上季要踢附加賽先保得住俄超席位，今季僅以兩分之微屈居亞軍，下季仲有歐聯踢，有晒交代。護級方面，摩度維亞同莫斯科戴拿模輸波，來季齊齊降班，古賓同安治就要踢護級附加賽。