雖然轉會市場未開，阿仙奴領隊雲格已經忍唔住出手，瑞士中場格列沙加上周六到咗球會影波衫相，轉會手續冇咩問題，等七月轉會窗重開就落實。傳聞阿仙奴付出2,500萬鎊（約2.8億港元），另加500萬鎊潛在獎金，喺德甲慕遜加柏收購呢位23歲中場。雲格呢次咁心急買人，睇嚟係擔心格列沙加喺今屆歐國盃大放異彩，到時慕軍坐地起價。不過，格列沙加又係踢防中，球隊本身已經有艾朗藍斯、高基連同艾利尼等，雲格係咁儲防中又有乜謂呢？