感情路上貪心，會焦頭爛額；事業路上貪心，會眾叛親離。自細我哋就被教育，唔好咁貪心，要知足先常樂，偏偏呢班過度活躍嘅朋友，就係唔聽話。
呢位仁兄，細細個幾好波，但發現踢波搵唔到食，於是掛靴做第二行，幾年後都係放唔低，又返去踢過，威咗幾年，最近被收山，但仲努力keep住副偈，為嘅係踢多一年得一年。
有位大隻佬，本來已經係一線籃球員，但係為咗一個出外打波嘅機會，決定重新嚟過赴笈讀四年大學做「留學威龍」，行耐啲，為咗行遠啲。
呢位妹妹，攞第一已成習慣，破紀錄多過入場睇戲，但係都未可以開懷大笑，因為中頭獎太普通，佢嘅目標係奧運金多寶。發夢想贏金多寶嘅人太多，但可以憑實力贏嘅人太少。
阿叔叔好鬼勤力日跑夜跑，雖然唔係一線水平，但竟然跑得番佢後生嗰陣嘅成績，係人都想有第二春，但難在付出嘅努力，係要多過以前幾倍。
呢位好多fans嘅球員前晚輸咗，旁邊嘅朋友仲諗住點樣安慰佢，點不知第二朝一早佢已經去咗做gym，唔畀自己唔開心。
有位大槌手本身係正選，但係每兩三個月，佢就挑剔自己改進一項小技術，唔改唔安樂，自己做自己最大嘅敵人。
有位妹妹為咗出外打比賽，辭職冇收入不特止，仲要自己畀旅費，回報係未來嘅大賽機會，不過投資涉及風險噃。
呢位仁兄仲離譜，平時有可愛小女友照顧無微不至，但佢竟然話要出外學法，流浪幾個月挑戰自己，離開是為了回來喎，扮咩浪子箒。
以上運動員其實唔使開名，因為如此儍佬儍妹嘅行為，又點止佢哋幾個吖。
KEYMAN
節目主持