曼聯7號球衣真係唔易孭，今季先加盟嘅荷蘭翼鋒迪比，表現一直雷聲大雨點小，連「契爺」雲高爾都撐唔落；上周六英足盃決賽，迪比更加連大軍名單都落選，大隊坐火車出發去倫敦，佢就自己揸車返屋企，去到練習基地門口，仲將波砵送埋畀門口保安，似乎對曼聯心死。有傳佢準備好今夏離開紅魔鬼，不過曼聯以2,500萬鎊（約2.8億港元）簽佢返嚟，就算打個八折，都未必有其他球隊「落叠」收留佢啦。
