大記者與一班朋友參加書法班，苦練近四年，略有小成，新年書寫揮春派俾親友，甚受歡迎，當然未達「師傅級」級數，不過大記者話，練書法本身就係磨練心智，並且有益健康，自己又不是三歲開始學習揸筆，並無奢望成為名師，能略窺書法堂奧，已經滿足，起碼識得分辨、欣賞上佳書法，叻過左丁山先啦；學完之後，得閒就教吓家姐嘅孫女書法初階，亦樂事也。
替左丁山家居維修，電燈、水喉、鋁窗、油漆無一不通，搵到佢有時間開工，左丁山就冇頭痛嘅大師傅肥陳，在左家睇到大記者之揮春，講一聲：「都唔錯，再學多十年八年就好掂嘞。」裝修師傅連書法都識？肥陳話：「我以前細路哥跟阿爺學書法，紮馬揸筆，用右手揸住隻雞蛋，由三歲揸到六七歲，但自己好動，好搞搞震，卒之係揸螺絲批搵食，唔敢揸筆為生，識睇書法，唔敢寫字。」
唔，祖父母教寫書法就最理想，如若無此幸福，不如教小孩子學習書法，順便弘揚孝道。大記者話新亞師姐，退休校長（前何文田官中校長）呂令意為每年一度之「祖父母日」（香港長者協會主辦）籌辦全港學生書法比賽，分小四至小六，中一至中六兩組，比賽形式係以毛筆抄寫胡國賢先生創作之「親情四字謠」，字體任擇。「祖父母日」之書法比賽，聽落應與孝順敬愛祖父母有關，所謂「親情四字謠」，究竟係乜東東，大記者傳來一睇，內容如下：「祖為根本，深遠綿長；父為枝幹，茁壯昂揚；子為花葉，綠蔭飄香；孫為籽實，不息自強。承先啟後，代代傳承；本生幹立，葉茂實盈；心耕不輟，處處欣榮； 親情有樹，萬世常青。」
參加者透過抄寫，緊記心耕不輟，敬愛祖父母之情油然而生。主辦單位會邀請大學教授、講師、資深老師等人作評判，歡迎全港學生報名參加，報名於5月30日截止，報名及查詢電話27286577，27286278。大記者話自從學習書法之後，了解書法有怡情養性之用，一次到大埔慈山寺觀賞觀音像，在寺內抄寫心經，成個人好似經歷咗一次心靈沐浴，頭腦清新，精神愉快，如果學生參加「祖父母日」書法比賽，抱着不在乎勝利，只在乎參與嘅心情，抄寫「親情四字謠」，用心牢記，當會時常孝順祖父母。