里約奧運男女籃嘅賽程喺日前公佈，中國男籃第一場波就遇上最強對手、衞冕嘅「夢幻隊」美國。中國喺A組嘅對手除咗美國之外，仲有委內瑞拉、澳洲同埋兩支仲要打資格賽先決出嘅球隊，八月六日進行第一場分組賽就要面對最大考驗。中國男籃最近已經開始咗集訓，不過備受注目嘅周琦因為要準備NBA選秀仲未歸隊，據報周琦去完塞爾特人同埋灰熊參加單獨訓練之後，仲會去多兩間球會，要押後到周四先返中國。